ప్రేమాంతరంగం

కలలు కనడం
ప్రేమించిన ప్రియులకోసం
ఎదురీదడం కొత్తకాదు

జీవితం ప్రవాహాలైపోతున్నప్పుడు
ఎదురీదడం సాహసమే!

నకనకలాడిన ఆకలి పేగులు
ఈ దారిలో వొలికిన కన్నీళ్ళు
కొత్త జవసత్వాలనిస్తాయి

ప్రేమలో కొత్తదనమేమీ లేదు
నాల్గు నయలాలో
రెండు హృదయాల స్పందనో కాదు
ప్రేమించే హృదయానికి
ద్వారాలు విశాలం చేయటం తప్ప

ఎవరికి వారే వేసే అడుగులు
జీవితసారాల పాదముద్రల్ని
జ్ఞాపకం చేస్తుంటాయి సుమా!

* * *

పత్రహరితం కోసం
ఆకులైనప్పుడు
అజా పిలుపు మేల్కొలుపుతుంది

సూర్యుడో నీతి సూర్యుడో 
రథమెక్కో మోకరించో ఎదురౌతారు

కువకువలాడే పిట్టల్లా
ఆలోచనలు రెక్కలు విప్పుతాయి

ఎదురౌతున్నదంతా విశాలమే
ఆడించాల్సిన రెక్కల సత్తువే లెక్క

నిన్నటి జ్ఞాపకమై మిగలాలంటే
ఒంటరిగా పారిపో
ఎందరో
ఆహ్వానం పల్కడానికి
సిద్దంగా వుంటారు

రేపటి కాంతై వెలగాలంటే
సమూహాల్లోకి చొరబడు
అందరూ
విమర్శించే వాళ్ళే ఎదురౌతారు

ఎదుర్కొంటూ ఎదుర్కొంటూ
పుటంవేసిన బంగారమై
ఎదురయ్యే
రంగురంగుల లోకంలో
జంటలు జంటలుగా
ప్రేమజంటలు