ప్రేమ గెలుపు

ప్రేమ గెలుపు


ఇరువు ఒక్కటవ్వటమేనని

జీవన భాగస్వామ్యానికి

ఎవరికివారే పరిథులు గీసుకుంటూ

ఎవరికివారే నిర్వచించుకుంటూ

నిరంతరవలయాలలో చిక్కుకుంటూ

తరంనుంచి తరానికి

వారధులేవో నిర్మిస్తూనో

అగాథాల్ని సృష్టిస్తూనో

తరంగమై ఎగసిపడే జంటలకు

ఒక్కసారి ఆలింగనమయ్యాక

ఈదవసిందే!

పయనించాల్సిందే!



పట్టుదొరికితే ప్రతి అడుగూ


కొలంబస్ మోపిన పాదమే అవుతుంది


టెన్సింగ్ నార్కే ఎగరేసిన జెండా అవుతుంది

ఎవరినైనా ప్రేమించాలి

ఎవరినైనా ప్రేమించాలి

అచేతనపు బీడుల్లో

వొంటరితనాన్ని ఈదుకుంటూ

చేతనాలింగన

ఎదురుచూపుల కోసం

ఎడారి ఇసుకల్లోంచి

జారిపోయిన వసంతాలు

వెదలేని కన్నుల్లో

ఖర్జూరపు తీపికోసం

ప్రవాహ తీరాలకోసం

***

ఎవర్ని ప్రేమించాలి?

ఎప్పుడు ప్రేమించాలి?

ఎలా ప్రేమించాలి?


వ్యక్తపరచలేని ప్రేమభావం

విచ్చుకోని మొగ్గౌతుంది

చూపులు కలిసిన శుభఘడియేదో

ఆత్మలను కలుపుతుంది

గాలి చొరబడని కౌగిలింతేదో

బందీల్ని చేస్తుంది

***


పరిమళించిన పథాలలో

నడిచారో, పరుగెత్తారో, అలసిపోయారో

స్విచ్ వేయగానే గిర్రున తిరిగే ఫేనులా

కాలమేమి తిరగదు

ఒకరికొకరుగా ప్రీతిచేయడానికి

మనకు మనంగా శృతిచేయడానికి

మధ్య మధ్య ప్రవేశిస్తూనే వుంటుంది

వడిసి పట్టుకోవడం

మెలిపెట్టడం

సహనాన్నో బందాన్నో పరీక్షించడం

నడిపించడం పరుగులెత్తించడం

ఏడ్పించడం నవ్వించడం

దూరం చేయడం దగ్గరవ్వడం

కళ్ళలో కలలు నింపడం

దానికి వెన్నతో పెట్టిన విద్య

ఎవర్ని గెలిపిస్తుందో

ఎవర్ని ఓడిస్తుందో

బహుశ

తను అలసినప్పుడు

మరో జంటను వెతుకుతుంది

దాని వెతకడం ఆ జంట వంతౌతుంది.

ప్రేమాంతరంగం

అప్పుడప్పుడూ
చూపులు పాకుతుంటాయి
లోతుల్లోకో లోపాలలోకో

అప్పుడప్పుడూ
చూపులు వెదకుతుంటాయి
ఆదమర్చిన  యదపైకి

అప్పుడప్పుడూ
చూపులు వెంటాడుతాయి
వదిలేసిన పాదాల అడుగులతోటి
చూపులు గమనిస్తుంటాయి
కప్పుకున్న వస్త్రం వెనుక దాగిన రహస్యాన్ని
బట్టబయలుకాని దానికోసం
రహస్య అన్వేషణ సాగుతుంది


కళ్ళెదుట కన్పించే  రంగు
కంటిని కవ్విస్తుంది

అలంకారాలన్నీ
అందాలుగానే కన్పిస్తాయి

పులకరింత రేపిన వయసు
కవ్వించే సొగసు
కలిసి
కేరింతలు వేస్తుంది మనసు

నిదురేరాని రాత్రులన్నీ
పులకింతల పున్నమిలౌతాయి
--------
photo courtesy : flicker.com

దానిపేరు ప్రేమైతే

కాలం గుప్పెట్లో చిక్కిన
రెండుహృదయాల మధ్య జరిగే నిరంతర ప్రవాహం

కాలానికి వయసులేనట్టే
ప్రవాహానికీ వయసులేదు

ప్రవాహం ఎక్కడపుడుతుందో
ఎక్కడికో తెలియని నిరంతర ప్రయాణం
సాగిస్తూ కొనసాగిస్తూ
ప్రవహించే చోటుల్లో పచ్చదనాన్ని నింపుతూనే వుంటుంది

దానిపేరు ప్రేమైతే
పచ్చదనం ఎవరెవరిని అంటుకుంటుందో కదా!

నువ్వు

ఎదెరురెదురు పడని
ఉదయ సాయంకాలలో
ఎదో ఒక క్షణం
ఎదురుపడే జ్ఞాపకం నువ్వు

ప్రేమతరంగం

ప్రేమతరంగం
ప్రేమను గూర్చిన
భావతంగాలు
అనుభూతులు
అనుభవాలు
ఇంకా..... అలా... అలా.. మరికొన్ని
వాటిమధ్య
ఆనందం
కొంచం కష్టం
కొంచం దుఃఖం 
జీవితం
జీవనం


ఒకరితో ఒకరు పంచుకుందాం