ప్రేమాంతరంగం: ప్రేమాంతరంగం - కని పెంచినవారి కలలు చెదిరినప్పుడు

Thursday, October 20, 2011

ప్రేమాంతరంగం - కని పెంచినవారి కలలు చెదిరినప్పుడు

కని పెంచినవారి
కలలు చెదరి
కల్లలైపోతున్నప్పుడు
పరస్పరావగాహన కరువై
విరోధులై ఎదురు నిలుస్తారు

కూలిన ఆశాసౌధాల మధ్య
ఇరుక్కుని
అప్పటివరకూ
పెంచుకున్న ఆత్మీయతంతా
వర్గాలుగా చీలిపోతుంది

గాయపడిన మనసు
సంఘర్షణ సమస్యలు
ఒక్కుమ్మడిగా పుట్టుకొచ్చే వుసుళ్ళుగా
రాత్రి దీపకాంతిని చుట్టి
నిర్జీవాలై
ఉషోదయ కాంతిలో వూడ్చబడతాయి

కనిపెంచినవారి
కలలు చెదిరి
కల్లలైపోతున్నప్పుడు
మెడలువంచే
కన్పించని అంశమేదో
రాజీ చేసి
నిశ్శబ్దంగానో
సహకారులుగానో
నిలబెడ్తుంది

నవొదయంలో
మౌనాన్ని మునిపంటనొక్కి
రంగులద్దిన
గువ్వల జంటలై
కొత్త రాగాలాపనకై
ఎదురుచూస్తూ
వొంటరిగానే
రెప రెపలాడే ప్రేమజంటలు