కోకిలవయ్యావు
పంటికిందో కంటికిందో నొక్కి
కురవని మేఘాలై కదలి
విశాలాకాశమై విస్తరించేవు
ముడుచుకున్నది మౌనమొ
కడుపులోకి మోకాలో
పదుగురికి పంచిన
పరమాన్నమై పలుకరించేవు
భావాలు మేఘాలై
వర్షిస్తున్న ఆకాశంకింద
అలలు అలలు
అనుభూతుల వెన్నెల మేళాలు
సంఘర్షణలతో
ఎగసిపడే కెరటాలు
సంబంధాల నడుమ
ఆవిరయ్యే ఉపరితలాలు
ఎల్లలెరుగక
విశాలంగా విస్తరించే జలాలు
శాశ్వతంగా బందించే
లోతైన నిధులతో ప్రేమొక సముద్రం
పైకి కంపించేదేదీ లొనుండదు
లోనున్నదేదీ పైకి కంపడదు
విచిత్ర లావణ్య గర్భంలో
రహస్య నిలయం
విచ్చిన్నమై సమైక్యపడుతూ
సమక్యపడి రూపాంతరమౌతూ
నిక్షిప్త వలయాలుగా
తరంగమై ఎగసిపడుతుంది
నిర్దిష్ట నియమాల దారులేవీ
నిర్మించుకోదు
ఏ తిరానికీ దిక్సూచి కాదు
కలై
కన్రెప్పల అద్దంపై వాలి
పొడుస్తూనే వుంటుంది
రెప్పతెరిస్తే
కలా వుండదు పిచ్చుకా వుండదు
జ్ఞాపకమైన శబ్దాన్ని
హృదయంలోకి పిండుకోవడమే
తరంగం
పదికాలాలు దాచుకోవడమే
జీవితం
నిరంతరం
వెల్లువెత్తే తరంగాలలో
"నేను నిన్ను ప్రేమిస్తున్నాను
అని చెప్పినంత తేలిక కాదు
ఇంకా నిన్ను ప్రేమిస్తున్నానని చెప్పడం "
నాట్లేసిన పైరులా
యవ్వనంఊగుతోంది
ఇరువురొక్కగానమై
రేపటి పంటై ఫలించాలి
